ભારતીય ક્રિકેટ માટે ૮ માર્ચ ૨૦૨૬નો દિવસ સુવર્ણ અક્ષરે લખાઈ ગયો છે. અમદાવાદના નરેન્દ્ર મોદી સ્ટેડિયમ ખાતે રમાયેલી રોમાંચક ફાઈનલમાં ભારતે ન્યુઝીલેન્ડને ૯૬ રનથી હરાવીને ત્રીજી વખત T20 વર્લ્ડ કપનો ખિતાબ જીતી લીધો છે. આ ઐતિહાસિક વિજય સાથે ભારત સતત બે વખત (૨૦૨૪ અને ૨૦૨૬) વર્લ્ડ કપ જીતનાર અને પોતાના જ દેશમાં ટ્રોફી ઉંચકનાર વિશ્વની પ્રથમ ટીમ બની છે.
સૂર્યકુમાર યાદવની કેપ્ટનશીપ હેઠળ ભારતીય બેટર્સ અને બોલર્સે મેદાનમાં અદભૂત પ્રદર્શન કર્યું હતું. પ્રથમ બેટિંગ કરતા ભારતે ૨૦ ઓવરમાં ૨૫૫/૫નો વિશાળ સ્કોર ઉભો કર્યો હતો, જે T20 વર્લ્ડ કપ ફાઈનલના ઈતિહાસનો સૌથી મોટો સ્કોર છે. સંજુ સેમસને માત્ર ૪૬ બોલમાં ૮૯ રનની આક્રમક ઈનિંગ રમી હતી, જ્યારે ઈશાન કિશને ૫૪ અને અભિષેક શર્માએ ૫૨ રનનું મહત્વનું યોગદાન આપ્યું હતું. અંતિમ ઓવરમાં શિવમ દુબેએ ૮ બોલમાં ૨૬ રન ઝીંકીને ભારતને મજબૂત સ્થિતિમાં પહોંચાડ્યું હતું.
૨૫૬ રનના પહાડ જેવા લક્ષ્યનો પીછો કરવા ઉતરેલી ન્યુઝીલેન્ડની ટીમ ભારતીય બોલરો સામે લાચાર દેખાઈ હતી. જસપ્રીત બુમરાહે માત્ર ૧૫ રન આપીને ૪ વિકેટ ઝડપી કીવી ટીમના બેકબોન તોડી નાખ્યા હતા, જેના બદલ તેને ‘પ્લેયર ઓફ ધ મેચ’ જાહેર કરાયો હતો. અક્ષર પટેલે પણ ૩ વિકેટ લઈને ન્યુઝીલેન્ડને ૧૫૯ રન પર ઓલઆઉટ કરવામાં મહત્વની ભૂમિકા ભજવી હતી. આખી ટૂર્નામેન્ટમાં શાનદાર પ્રદર્શન કરનાર સંજુ સેમસનને ‘પ્લેયર ઓફ ધ ટૂર્નામેન્ટ’નો એવોર્ડ મળ્યો હતો.
આ જીત સાથે ભારતે નરેન્દ્ર મોદી સ્ટેડિયમમાં જૂની યાદોને પાછળ છોડી દીધી છે અને ૮૬,૦૦૦થી વધુ પ્રેક્ષકોની હાજરીમાં વંદે માતરમના ગુંજ વચ્ચે ચેમ્પિયન બનવાનું ગૌરવ મેળવ્યું છે.
