રેપો રેટ ફરી યથાવત, લોન મોંઘી નહીં થાય:RBIએ વ્યાજ દર 5.25% પર યથાવત રાખ્યો; 2025માં ચાર વખતમાં 1.25%નો ઘટાડો કર્યો હતો.
આ વખતે રેપો રેટમાં કોઈ ફેરફાર કરવામાં આવ્યો નથી. તેને 5.25% પર યથાવત રાખવામાં આવ્યો છે. એટલે કે લોન મોંઘી નહીં થાય અને તમારી EMI પણ વધશે નહીં. RBI ગવર્નર સંજય મલ્હોત્રાએ આજે 6 ફેબ્રુઆરીના રોજ મોનેટરી પોલિસી કમિટીની બેઠકમાં લેવાયેલા નિર્ણયોની જાણકારી આપી.
રિઝર્વ બેંક ઓફ ઇન્ડિયા એટલે કે, RBIએ ડિસેમ્બરમાં વ્યાજ દર 0.25% ઘટાડીને 5.25% કર્યા હતા. RBI જે દરે બેંકોને લોન આપે છે તેને રેપો રેટ કહેવાય છે. જ્યારે RBI રેપો રેટ ઘટાડે છે, ત્યારે બેંકોને સસ્તી લોન મળે છે અને તેઓ આ લાભ ગ્રાહકો સુધી પહોંચાડે છે.
