સુરેન્દ્રનગર જિલ્લાના સાયલા પંથકમાં છેલ્લા ૫૦ વર્ષથી ધમધમતો ક્વોરી ઉદ્યોગ હાલ ગંભીર કટોકટીમાં મુકાયો છે. વિવિધ પડતર માંગણીઓને લઈને છેલ્લા ૬ દિવસથી ક્વોરી માલિકોએ કામકાજ ઠપ કરી દેતા હડતાળનો માર્ગ અપનાવ્યો છે. આ હડતાળને કારણે ઉદ્યોગની સાથે સાથે સરકારની આવકને પણ મોટો ફટકો પડ્યો છે.
હડતાળને કારણે છેલ્લા ૬ દિવસમાં આશરે ૫૦ હજાર ટન કપચી (બ્લેક સ્ટોન)નો નિકાસ અટકી પડ્યો છે. સાયલાની કપચી સમગ્ર રાજ્યમાં મોકલવામાં આવે છે, પરંતુ હાલ સપ્લાય બંધ થતા બાંધકામ ક્ષેત્ર પર પણ તેની અસર દેખાવા લાગી છે. બીજી તરફ, રોયલ્ટીની આવક અટકી પડતા સરકારને અંદાજે ૨ કરોડ રૂપિયાનું નુકસાન થયું હોવાનું અનુમાન છે.
ક્વોરી ઉદ્યોગ સાથે સંકળાયેલા અગ્રણીઓના જણાવ્યા મુજબ, તેઓ લાંબા સમયથી વહીવટી તંત્રની ઉપેક્ષાનો ભોગ બની રહ્યા છે:
- પેન્ડિંગ ફાઈલો: છેલ્લા ૫ વર્ષથી ૩૫ જેટલી લીઝ (Lease) ની ફાઈલો મંજૂરી વગર પેન્ડિંગ પડી છે.
- બ્લોક ફાળવણીનું વચન: વર્ષ ૨૦૧૨માં સરકાર દ્વારા નવા બ્લોક ફાળવવાનું વચન આપવામાં આવ્યું હતું, જે ૧૪ વર્ષ વીતવા છતાં હજુ સુધી પૂર્ણ થયું નથી.
- સ્થાનિક રોજગારી પર અસર: સાયલામાં ૧૩૦થી વધુ ભરડીયા (Crushers) આવેલા છે, જેના પર હજારો શ્રમિકોની રોજીરોટી નિર્ભર છે. હડતાળ લંબાવવાથી શ્રમિક પરિવારોની હાલત પણ કફોડી બની રહી છે.
