ભારતની પ્રથમ સેમી-હાઈ-સ્પીડ પ્રાદેશિક રેલ સેવા ‘નમો ભારત’ હવે દેશના માળખાગત વિકાસની નવી ઓળખ બની રહી છે. આજે રવિવારે (22 ફેબ્રુઆરી, 2026) વડાપ્રધાન નરેન્દ્ર મોદી દિલ્હી-ગાઝિયાબાદ-મેરઠ કોરિડોરના બાકી રહેલા અંતિમ તબક્કા અને મેરઠ મેટ્રોનું લોકાર્પણ કરશે. આ સાથે જ 82.15 કિલોમીટર લાંબો આ સંપૂર્ણ કોરિડોર જનતા માટે ખુલ્લો મુકાશે, જે દિલ્હી અને ઉત્તર પ્રદેશ વચ્ચેના કનેક્ટિવિટીના સમીકરણો બદલી નાખશે.
સરાય કાલે ખાનથી મેરઠ: હવે સફર થશે સુપરફાસ્ટ
અત્યાર સુધી આ કોરિડોરનો માત્ર 55 કિલોમીટરનો હિસ્સો કાર્યરત હતો, પરંતુ હવે મુસાફરો દિલ્હીના હૃદય સમાન સરાય કાલે ખાનથી સીધા મેરઠ સુધીની મુસાફરી કરી શકશે. શુક્રવારે મેરઠના બેગમપુલથી દિલ્હી વચ્ચે સફળ ટ્રાયલ રન કરવામાં આવ્યો હતો. આ પ્રોજેક્ટની સૌથી મોટી વિશેષતા એ છે કે જે અંતર કાપતા ખાનગી વાહન કે બસમાં અંદાજે 2.5 કલાક લાગે છે, તે હવે નમો ભારત દ્વારા માત્ર 55 મિનિટમાં પૂર્ણ થશે.
લક્ઝરી સુવિધા અને આધુનિક ટેકનોલોજી
નમો ભારત ટ્રેન માત્ર ઝડપ જ નહીં, પણ લક્ઝરી મુસાફરીનો અનુભવ પણ પૂરો પાડે છે. આ ટ્રેનમાં મુસાફરોને નીચે મુજબની સુવિધાઓ મળશે:
- સમયની બચત: ટ્રાફિક જામ અને માનસિક થાકમાંથી મુક્તિ.
- આધુનિક કોચ: એરોડાયનેમિક ડિઝાઇન અને પ્રીમિયમ બેઠક વ્યવસ્થા.
- મેરઠ મેટ્રો: આ પ્રોજેક્ટ સાથે મેરઠ શહેરની આંતરિક મેટ્રો સેવા પણ શરૂ થવાથી સ્થાનિક પરિવહન સરળ બનશે.
