ગાંધીનગર: રાજ્યના પાટનગરમાં રિક્ષાચાલકો હવે મોંઘવારી સામે આરપારની લડાઈના મૂડમાં જણાઈ રહ્યા છે. ઓટો રિક્ષા એસોસિએશન દ્વારા લઘુત્તમ ભાડા (Minimum Fare) માં સીધો 10 રૂપિયાનો વધારો કરવાની માંગણી સાથે સરકાર અને તંત્ર પર દબાણ વધારવામાં આવ્યું છે.
શું છે રિક્ષાચાલકોની મુખ્ય માંગણીઓ?
- લઘુત્તમ ભાડું: હાલના લઘુત્તમ ભાડામાં 10 રૂપિયાનો વધારો કરી તેને 30 રૂપિયા કરવામાં આવે.
- પ્રતિ કિલોમીટર વધારો: રનિંગ કિલોમીટર દીઠ 5 રૂપિયાનો વધારો આપવાની માંગ.
- 4 વર્ષનો ઈન્તજાર: રિક્ષાચાલકોના જણાવ્યા મુજબ, છેલ્લા ચાર વર્ષથી ભાડામાં કોઈ સુધારો કરવામાં આવ્યો નથી, જેના કારણે મધ્યમ વર્ગના રિક્ષાચાલકોની કમર તૂટી ગઈ છે.
વધારા પાછળના મુખ્ય કારણો: રિક્ષાચાલકોનું કહેવું છે કે CNGના ભાવમાં સતત વધારો અને સ્પેરપાર્ટ્સ સહિત દૈનિક જીવનજરૂરી ચીજવસ્તુઓની મોંઘવારીને કારણે જૂના ભાડામાં ઘર ચલાવવું હવે અશક્ય બન્યું છે. જો તંત્ર દ્વારા વહેલી તકે ભાડા સુધારા અંગે યોગ્ય નિર્ણય લેવામાં નહીં આવે, તો આગામી દિવસોમાં આંદોલન વધુ તેજ બનવાની શક્યતા છે.
હવે જોવાનું એ રહે છે કે, સામાન્ય જનતાના ખિસ્સા પર પડનારા બોજ અને રિક્ષાચાલકોની આજીવિકા વચ્ચે સરકાર કેવો મધ્યમ માર્ગ કાઢે છે.
