અમદાવાદમાં ટ્રાન્સપોર્ટ કમિશનર દ્વારા રેટ રિવિઝન મુદ્દે બેઠક ન બોલાવવામાં આવતા રિક્ષાચાલક એસોસિએશને પોતે જ ભાડા વધારવાનો નિર્ણય લીધો હોવાનું જણાવાયું છે. એસોસિએશનના જણાવ્યા મુજબ છેલ્લા ચાર વર્ષથી ભાડામાં કોઈ વધારો કરવામાં આવ્યો નહોતો અને ચૂંટણી પહેલાં ભાડા વધારાનો નિર્ણય પરિણામ બાદ કરવા મૌખિક મંજૂરી આપવામાં આવી હતી. ચૂંટણી બાદ CNGના ભાવમાં પણ રૂ. 7નો વધારો થયો હોવા છતાં ભાડું યથાવત રાખવામાં આવ્યું હતું. હવે રેટ કમિટીની સત્તાવાર મંજૂરી વગર જ રિક્ષા ભાડામાં વધારો જાહેર કરવામાં આવ્યો છે. નવા દર મુજબ મિનિમમ ભાડું રૂ. 20થી વધારી રૂ. 30 કરવામાં આવ્યું છે, જ્યારે મિનિમમ બાદ પ્રતિ કિલોમીટર રૂ. 5નો વધારો કરવામાં આવ્યો છે. હવે મુસાફરોએ પ્રતિ કિલોમીટર રૂ. 15ના બદલે રૂ. 20 ચૂકવવા પડશે. રિક્ષાચાલકોએ ગ્રાહકોને વધારેલું ભાડું ચૂકવવા અપીલ પણ કરી છે.
