મુંબઈ-અમદાવાદ બુલેટ ટ્રેન પ્રોજેક્ટ હેઠળ અમદાવાદમાં તમામ 13 ભારે પ્રીકાસ્ટ કોંક્રિટ પોર્ટલ બીમનું સફળતાપૂર્વક લોન્ચિંગ પૂર્ણ કરવામાં આવ્યું છે. જેમાં 1,640 મેટ્રિક ટન વજન ધરાવતો સૌથી ભારે પોર્ટલ બીમ રેલવે લાઇન પર માત્ર ત્રણ કલાકમાં સફળતાપૂર્વક સ્થાપિત કરવામાં આવ્યો હતો. સાબરમતી ખાતે અંતિમ અને સૌથી ભારે પોર્ટલ બીમના લોન્ચિંગ સાથે પ્રોજેક્ટે વધુ એક મહત્વપૂર્ણ એન્જિનિયરિંગ સિદ્ધિ હાંસલ કરી છે. આ દરમિયાન મણિનગર ખાતે મુંબઈ-અમદાવાદ મુખ્ય રેલવે લાઇન પર 5, વટવા ખાતે 7 અને સાબરમતી ખાતે અમદાવાદ-દિલ્હી મુખ્ય રેલવે લાઇન ઉપર 1 પોર્ટલ બીમ સફળતાપૂર્વક લોન્ચ કરવામાં આવ્યો છે. લોન્ચ કરાયેલા તમામ 13 પોર્ટલ બીમોમાં આ સૌથી ભારે પ્રીકાસ્ટ કોંક્રિટ પોર્ટલ બીમ ગણાય છે, જે બુલેટ ટ્રેન પ્રોજેક્ટની ઝડપી પ્રગતિ દર્શાવે છે.
