ભારતના ‘સેમિકન્ડક્ટર મિશન’ને વેગ આપવા માટે ગુજરાતના ધોલેરામાં જાપાનીઝ ટેકનોલોજી અને લોજિસ્ટિક્સનો સમન્વય થવા જઈ રહ્યો છે. જાપાનની બે મોટી કંપનીઓ, નાગાસે એન્ડ કંપની (Nagase & Co.) અને નિપ્પોન એક્સપ્રેસ (NX Group) એ ભારતની સપ્લાય ચેઇન ઇન્ફ્રાસ્ટ્રક્ચરને મજબૂત કરવા માટે એક મહત્વપૂર્ણ સમજૂતી કરાર (MoU) પર હસ્તાક્ષર કર્યા છે.
આ સહયોગ ખાસ કરીને ધોલેરા સ્પેશિયલ ઇન્વેસ્ટમેન્ટ રિજન (DSIR) માં સેમિકન્ડક્ટર મેન્યુફેક્ચરિંગ માટે જરૂરી હાઇ-ટેક સપ્લાય ચેઇન ઊભી કરવા માટે કરવામાં આવ્યો છે. સેમિકન્ડક્ટર (ચિપ્સ) બનાવવા માટે અત્યંત ચોકસાઈ અને ખાસ પ્રકારના રો-મટીરિયલની જરૂર હોય છે, જે આ બંને કંપનીઓ પૂરી પાડશે.
ધોલેરા હાલમાં ‘ઇન્ડિયા સેમિકન્ડક્ટર મિશન’નું હૃદય બની રહ્યું છે. અહીં ટાટા ગ્રુપ અને તાઇવાનની પાવરચિપ (PSMC) જેવી કંપનીઓ પહેલેથી જ મોટા રોકાણ કરી રહી છે. જાપાનીઝ કંપનીઓના આ જોડાણથી અહીં ચિપ બનાવવાની આખી ઇકોસિસ્ટમ વધુ સક્ષમ બનશે, જે સ્થાનિક ઉત્પાદન અને રોજગારીમાં મોટો વધારો કરશે.
