ઈરાન અને અમેરિકા વચ્ચે સંભવિત ડીલ અંગેના આશાવાદી સંકેતો વચ્ચે આંતરરાષ્ટ્રીય બજારમાં ક્રુડ ઓઈલના ભાવમાં મોટો કડાકો નોંધાયો છે. ક્રુડના ભાવમાં આશરે 5 ટકા સુધીનો ઘટાડો થતા બ્રેન્ટ ક્રુડ 4.51 ડોલર ઘટીને પ્રતિ બેરલ 98 ડોલર સુધી પહોંચ્યું છે, જે છેલ્લા બે અઠવાડિયાના સૌથી નીચલા સ્તર તરીકે નોંધાયું છે. ગત અઠવાડિયે પણ ક્રુડના ભાવમાં ઘટાડો જોવા મળ્યો હતો. નોંધનીય છે કે યુદ્ધ શરૂ થયા બાદ એક સમયે ક્રુડના ભાવ 111 ડોલર સુધી પહોંચી ગયા હતા અને અત્યાર સુધીમાં કુલ 30 ટકા જેટલો વધારો નોંધાયો હતો. જોકે હવે અમેરિકા-ઈરાન વચ્ચે સમજૂતીની શક્યતાઓ વધતા વૈશ્વિક સપ્લાય સુધરવાની આશાએ બજારમાં ભાવ દબાણ હેઠળ આવ્યા છે.
