ગુજરાત સ્થાનિક સ્વરાજની ચૂંટણીઓના પરિણામોમાં મહાનગરોમાં ભારતીય જનતા પાર્ટીએ પોતાનો દબદબો જાળવી રાખ્યો છે, જ્યારે નગરપાલિકા સ્તરે કોંગ્રેસના ગઢમાં ગાબડું પાડવામાં ભાજપ સફળ રહ્યું છે.
વડોદરા અને ભાવનગર મહાનગરપાલિકા: વડોદરા મહાનગરપાલિકાના વોર્ડ નં. 13માં ભાજપે શાનદાર દેખાવ કરતા આખી પેનલ પર વિજય મેળવ્યો છે. તમામ બેઠકો અંકે કરીને ભાજપે આ વિસ્તારમાં પોતાની પકડ વધુ મજબૂત બનાવી છે. તેવી જ રીતે ભાવનગર મહાનગરપાલિકાના વોર્ડ નં. 10 (કાળિયાબીડ)માં પણ ભાજપની આખી પેનલે વિજય વાવટો લહેરાવ્યો છે. મતગણતરી બાદ ભાજપે અહીં સ્પષ્ટ બહુમતી સાથે વિજય મેળવતા કાર્યકરોમાં ભારે ઉત્સાહ જોવા મળ્યો હતો.
માળિયા મિયાણામાં રાજકીય સમીકરણો બદલાયા: મોરબી જિલ્લાની માળિયા મિયાણા નગરપાલિકા, જે વર્ષોથી કોંગ્રેસનો મજબૂત ગઢ ગણાય છે, ત્યાં આ વખતે ભાજપે મજબૂત એન્ટ્રી કરી છે. વોર્ડ નં. 1, 2, 4 અને 6માં કોંગ્રેસની પેનલનું પ્રભુત્વ રહ્યું છે, પરંતુ વોર્ડ નં. 3માં ભાજપે 3 બેઠકો જીતીને અને કોંગ્રેસે 1 બેઠક મેળવીને ઉલટફેર સર્જ્યો છે. જ્યારે વોર્ડ નં. 5માં પણ ભાજપના 3 અને કોંગ્રેસના 1 ઉમેદવારનો વિજય થયો છે. કોંગ્રેસના ગઢમાં ભાજપની આ એન્ટ્રીએ સ્થાનિક રાજકારણમાં ગરમાવો લાવી દીધો છે.
આ પરિણામો સ્પષ્ટ કરે છે કે શહેરી વિસ્તારોમાં ભાજપની પકડ યથાવત છે, જ્યારે ગ્રામીણ અને નગરપાલિકા સ્તરે હવે બંને પક્ષો વચ્ચે કડક સ્પર્ધા જોવા મળી રહી છે.
